പ്രജാസഭ

  • Published on October 24, 1906
  • By Staff Reporter
  • 220 Views

ശ്രീമൂലം പ്രജാസഭയുടെ തൃതീയ വാർഷികയോഗം ഈ വരുന്ന ജനുവരി 4- നു-ക്ക്  ധനു 20-ന് നടത്തപ്പെടുന്നതാണെന്ന് നിശ്ചയിച്ചു കഴിഞ്ഞുവല്ലോ. ഇത് സംബന്ധിച്ച്, സഭാസാമാജികന്മാരെ തെരഞ്ഞെടുത്ത്  അയയ്‌ക്കേണ്ടതിനെപ്പറ്റിയുള്ള നിബന്ധനകളെ ഇക്കഴിഞ്ഞ കന്നി 30- നു-ലെ സർക്കാർ ഗസറ്റിൽ ചേർത്തു കാണുന്നു. ഈവക നിബന്ധനകൾ കഴിഞ്ഞ കൊല്ലത്തിലെ നിബന്ധനകളിൽ നിന്ന് കുറെ ഭേദപ്പെട്ടവയാണെങ്കിലും, കാലം വൈകി പുറപ്പെട്ടിരിക്കുന്നു എന്നുള്ള ആക്ഷേപം നാടെങ്ങും മുഴങ്ങുന്നുണ്ട്. സാമാജികന്മാരെ തെരഞ്ഞെടുക്കുന്നതിന് യോഗ്യതയുള്ള ഓരോ താലൂക്കിലെയും അംഗങ്ങൾ, കഴിഞ്ഞ കൊല്ലം താലൂക്കാധികൃതന്മാരുടെ അറിയിപ്പ് അനുസരിച്ചാണ് തെരഞ്ഞെടുപ്പിനു വന്നു ചേർന്നിരുന്നത്. എന്നാൽ, ഇക്കൊല്ലം, തെരഞ്ഞെടുപ്പിന് സമ്മതിദാനം (വോട്ട്) ചെയ്യാൻ അധികാരപ്പെട്ടവർ തുലാം 10-നു മേൽ താമസിയാതെ താലൂക്ക് തഹശീൽദാർക്ക് വിവരം കാണിച്ച് എഴുതി അയച്ച് അറിവു കൊടുക്കണമെന്നാണ്, നിർബന്ധിച്ചിരിക്കുന്നത്. ഇത്, കഴിഞ്ഞ ആണ്ടത്തേതിൽ ഭേദപ്പെട്ട നിബന്ധനയാണ്.   തഹശീൽദാരന്മാർ സമ്മതിദാനം ചെയ്യാൻ യോഗ്യന്മാരായ അംഗങ്ങളെ എല്ലാവരെയും തെരിയപ്പെടുത്താതെയാണ് തിരഞ്ഞെടുപ്പ് യോഗം വിളിച്ചു കൂട്ടിയതെന്നുള്ള പരാതി ഇക്കഴിഞ്ഞ കൊല്ലം ചിലയിടങ്ങളിൽ ഉണ്ടായിരുന്നു. ഇക്കൊല്ലം ആ അപരാധം തഹശീൽദാരന്മാരുടെ മേൽ ചുമത്തുവാൻ വഴി വെച്ചിട്ടില്ല. എന്നാൽ തുലാം 20 - നകം തിരഞ്ഞെടുപ്പ് യോഗം വിളിച്ച് കൂട്ടണമെന്നും, അതിനു മുൻപായി, സമ്മതിദാനം ചെയ്യാൻ യോഗ്യതയുള്ളവരുടെ പേരുകളെ മറ്റു താലൂക്ക് തഹശീൽദാരന്മാരോട് ആലോചിച്ച് ശരിപ്പെടുത്തണമെന്നും തിരഞ്ഞെടുപ്പ് യോഗത്തിന് ഏഴ് ദിവസം മുമ്പ് എല്ലാവർക്കും അറിവ് കൊടുക്കണമെന്നും മറ്റും ചില നിബന്ധനകൾ ചെയ്തിരിക്കുന്നത് കൊണ്ട് തുലാം 15-നോടുകൂടിയെങ്കിലും, സമ്മതിദാനം ചെയ്യാൻ യോഗ്യതയുള്ളവർ, അപേക്ഷാ ഫോറം ഒപ്പിട്ട് തഹശീൽദാർക്ക് എത്തിച്ചു കൊടുക്കേണ്ടതാണല്ലോ. എന്നാൽ കന്നി 30-നുലെ സർക്കാർ ഗസറ്റിലുള്ള ഈ നിബന്ധനകൾ തിരുവിതാംകൂറിൻെറ എല്ലാ ഭാഗങ്ങളിലും ഈ 15-നു മുമ്പായി അറിയുമോ എന്നുള്ളത് കുറെ സംശയഗ്രസ്തമാണ്. സർക്കാർ ഗസറ്റ് തന്നെ അത്ര പ്രചുരപ്രചാരമുള്ളതല്ല. അതിൻെറ പ്രതികൾ എല്ലായിടത്തും എത്തിക്കഴിയുന്നതിന് രണ്ടാഴ്ചയോളം വേണം. ചൊവ്വാഴ്ച തിരുവനന്തപുരത്തു നിന്നും പുറപ്പെടുന്ന ഗസറ്റ് 20 നാഴിക അകലെയുള്ള ഈ സ്ഥലത്തു കിട്ടുന്നത് തന്നെയും വ്യാഴം ഉച്ചക്ക് മേലാണ്. ഈ സ്ഥിതിക്ക് പറവൂർ മുതലായ ദൂരസ്ഥലങ്ങളിലെ "ആരും കേറാമൂല"കളിൽ ഇവ എത്തുന്നത് എത്രയോ താമസിച്ചായിരിക്കും. അതിനാൽ പല തവണ സമ്മതിദാനം ചെയ്യാൻ അർഹതയുള്ളവരെല്ലാപേരും തിരഞ്ഞെടുപ്പിന് കൂടിയിട്ടില്ലെന്നു വന്നാൽ, അത് ആശ്ചര്യകരമല്ല. നിബന്ധനകൾ കാലേക്കൂട്ടി പുറപ്പെടുവിക്കുകയോ, തിരഞ്ഞെടുപ്പ് യോഗം കുറേക്കൂടി താമസിപ്പിക്കുകയോ ചെയ്തിരുന്നുവെങ്കിൽ ഭേദമായിരുന്നു.

പ്രജാസഭാ സാമാജികന്മാരായി 31 താലൂക്കുകളിൽ നിന്ന് 66 പേരെയും, പട്ടണ പരിഷ്‌കരണ കമ്മിറ്റികളിൽ നിന്നും ഓരോരുത്തൻ വീതം 5 പേരെയും കൂട്ടി 71 സാമാജികന്മാർ ഒഴികെ, ഒരോരോ പൊതുസംഘങ്ങളിൽ നിന്ന് ഓരോ പ്രധിനിധിയും സ്വീകരിക്കപ്പെടുന്നതാണ്. കഴിഞ്ഞ കൊല്ലത്തിൽ പത്തൊൻപതു സംഘങ്ങളുടെ പ്രാതിനിധ്യം അനുവദിക്കപ്പെട്ടിരിന്നു. ഇക്കുറി 11 സംഘങ്ങളുടെ പേരുകളേ കാണുന്നുള്ളൂ. മറ്റ് സംഘങ്ങൾ പ്രാതിനിധ്യം കിട്ടുവാൻ തുലാം 10-നു മേൽ താമസിയാതെ ഡിവിഷൻ പേഷ്ക്കാർ മുഖേന അപേക്ഷ അയക്കണമെന്നും ചട്ടങ്ങളിൽ പറഞ്ഞു കാണുന്നു. ഇപ്പോൾ ഗസറ്റിൽ ചേർത്തിരിക്കുന്ന നിബന്ധന പ്രകാരം 82 സാമാജികന്മാരേ തികഞ്ഞിട്ടുള്ളൂ. നൂറു തികയുന്നതിന് ഇത്രയും സംഘപ്രതിനിധികളെ സ്വീകരിക്കുമെന്നുള്ളതിനാൽ, പൊതുസംഘങ്ങൾ ഈ വിഷയത്തിൽ മന്ദിച്ചിരിക്കുവാൻ പാടില്ലാത്തതാകുന്നു. 


സാമാജികന്മാരെ തെരഞ്ഞെടുക്കുന്ന ...നാളുകൾ കഴിഞ്ഞകൊല്ലത്തിൽ ചിലെടങ്ങളിലൊക്കെ തഹശീൽദാരന്മാരുടെ ഇടയിൽ ഓരോരോ അപ്രാ......രെയും.......... ഉദ്യോഗസ്ഥന്മാരെപ്പറ്റി പറയുവാൻ ....തെരഞ്ഞെടുത്ത് ....സഭയിൽ ഉന്തിത്തള്ളി അയയ്ക്കചെയ്യരുതെന്ന് ഞങ്ങൾ മുൻകൂട്ടി പറഞ്ഞുകൊള്ളുന്നു. ഈ സംഗതിയെപ്പറ്റി അടുത്ത ലക്കത്തിൽ പറയുന്നതാണ്. 


You May Also Like